Á morgunverðarfundi Samtaka atvinnulífsins um áhrif veiðigjalda og annarra skatta á fyrirtæki kom skýrt fram að fulltrúar atvinnulífsins og sjávarútvegssveitarfélaga hafa alvarlegar áhyggjur af fyrirhuguðum skattahækkunum. Fundurinn fór fram á Hilton Nordica og var mjög vel sóttur, undir styrkri fundarstjórn Sigríðar Margrétar Oddsdóttur, framkvæmdastjóra SA.

Jón Ólafur Halldórsson, nýr formaður SA, flutti fyrsta erindið og lagði áherslu á mikilvægi þess að draga úr álögum á atvinnulífið í ljósi óvissu á alþjóðavettvangi. Hann vísaði til reynslu sem sýni að aukin skattlagning dragi úr framtíðarfjárfestingum.

Anna Hrefna Ingimundardóttir, aðstoðarframkvæmdastjóri og forstöðumaður efnahagssviðs SA, benti á að vandi opinberra fjármála væri fyrst og fremst útgjaldavandi en ekki tekjuvandi, þar sem umfang skattheimtu hérlendis væri með því mesta sem gerist í heiminum. Hún lýsti áhyggjum af fyrirætlunum stjórnvalda um að hækka skatta, sérstaklega á útflutningsgreinar sem glími við krefjandi rekstrarumhverfi, hátt raungengi og mikla óvissu í alþjóðaviðskiptum.

Lovísa Anna Finnbjörnsdóttir frá Deloitte kynnti nýja greiningu á áhrifum fyrirhugaðrar hækkunar veiðigjalda. Þar kom fram að gildistaka frumvarpa um veiðigjöld og kolefnisgjöld gæti haft umtalsverð áhrif á rekstrarafkomu sumra fyrirtækja, jafnvel að því marki að hagnaður þeirra gæti snúist í tap. Hún nefndi meðal annars dæmi um fyrirtækin Norðureyri, FISK Seafood, Skinney-Þinganes og Síldarvinnsluna og fjallaði jafnframt um heildaráhrif á atvinnugreinina.

Í pallborðsumræðum undir stjórn Björgvins Inga Ólafssonar hjá Deloitte komu fram skiptar skoðanir. Hanna Katrín Friðriksson, atvinnuvega- og nýsköpunarráðherra, lagði áherslu á réttláta auðlindarentu og mikilvægi þess að skattkerfið byggðist á raunverulegu aflaverðmæti. Guðmundur Fertram Sigurjónsson, stofnandi Kerecis, mótmælti túlkun ráðherrans og sagði íslenskan sjávarútveg þegar skila ríkinu umtalsverðum tekjum.

Íris Róbertsdóttir, bæjarstjóri Vestmannaeyja og formaður Samtaka sjávarútvegssveitarfélaga, kallaði eftir meiri fyrirsjáanleika og sameiginlegri greiningarvinnu áður en ákvörðun yrði tekin á Alþingi. Hún lýsti áhyggjum af áhrifum frumvarpsins á landsbyggðina og kallaði það „landsbyggðarskatt“.

Óðinn Gestsson, framkvæmdastjóri Íslandssögu, lýsti alvarlegum rekstraráhyggjum og dró upp mynd af samfélögum sem gætu tapað mikilvægum fyrirtækjum. Þórður Guðjónsson, forstjóri Skeljungs, benti á að hækkun kolefnisgjalds dragi úr samkeppnishæfni og nefndi dæmi um að skip tækju eldsneyti í Færeyjum frekar en hérlendis vegna lægri gjalda þar.

Einnig gafst gestum í sal tækifæri til að beina spurningum til pallborðsins. Fjölmargir tóku til máls, þar á meðal stjórnendur og fulltrúar úr atvinnulífinu. Í máli þeirra kom helst fram gagnrýni á skort á samráði og að ákvarðanir væru oft teknar með hraði án þess að málin fengju ítarlega umræðu og skoðun.

Hér eru gögnin sem SA tók saman um fyrirtækjaskatta.
Hér er greiningin um áhrif fyrirhugaðrar hækkunar á veiðigjöldum sem unnin var af Deloitte.

Streymi frá fundinum er hægt að sjá í spilaranum hér að neðan.